Kelko sobudźěłaćerjow Hornjołužiski zwjazk Carity tuchwilu ma,a kak wulki je podźěl před koronawirus šćěpjenych?
T. Bognitz: Wot lětušeho mamy z přewzaćom dźěćaceho domu swj. Antoniusa w Žitawje něhdźe 325 sobudźěłaćerjow. Podźěl přećiwo wirusej šćěpjenych sobudźěłaćerjow we wobłuku hladanje hiba so mjez 55 a 75 procentami.
Wuprajeja sobudźěłaćerjo swoje wobmyslenja přećiwo winowatosći šćěpjenja a hdyž, z kotrymi argumentami?
T. Bognitz: Woni wo wobmyslenjach rěča, kotrež su tež powšitkownje znate: zo su to jenož w krótkim času registrowane ćěpiła, zo njejsu trajne sćěhi dotal wuslědźene a zo zdźěla tež na připowědźene tak mjenowane mortwe šćěpiwo čakaja. Někotři maja tójšto antićěleskow a nimaja šćěpjenje tuž za trěbne, njejsu pak wustrowjenym runostajeni. Hišće aktulane skrótšenja statusa nješćěpjenych wjedźe k dalšemu pozhubjenju dowěry personala, štož słyšimy, za čož pak prawa adresa njejsmy.
Dyrbja 15. měrca nješćěpjeni sobudźěłaćerjo swoje dźěłowe městno wopušćić abo maće hinaše rjadowanja?
T. Bognitz: Nichtó z medicinskeho abo hladanskeho wobłuka njetrjeba swoje dźěłowe městno wopušćić. Planujemy z nimi dale kaž dotal a njemóžemy jich parować. Zastaranje nam dowěrjenych ludźi ma najwyšu prioritu. Budu-li dźěłowe zakazy wuprajene, potom dyrbi nam strowotniski zarjad z dobom nato wotmołwić,kak mamy w strukturnje słabym regionje nowych sobudźěłaćerjow namakać a/abo ze zbywacym personalom hladanja potrěbnych zastarać. Přiwzamy-li nowych potrěbnych, dyrbimy chutnje wo tym rozmyslować, hač móžemy jich zastaranje personelnje zawěsćić, zo bychmy jich zamóhli čłowjekahódnje hladać.
Kak móžeće njedostatki při zaručenju personala wurunać?
T. Bognitz: Sadźamy na zhromadnosć sobudźěłaćerjow, tak zo njetrjeba nas žadyn z nich wopušćić. Sobudźěłaćerjo so wšědnje testuja a chcemy, zo woni dale wusko hromadźe dźěłaja. Poskićerjo posłužbow za personal we wobłuku časoweho wobmjezowanja abo wupožčowanja personala njemóža nam pomhać. Dotalne nawěški a anonsy běchu bjez wothłosa. Chutnje měnjene požadanja pak rady přijimamy.
Su sobudźěłaćerjo hižo připowědźili, zo chcedźa dźěło wopušćić, snadź to tež hižo su, dóńdźe-li k šćěpjenskej winowatosći? A kotre konsekwency z toho wurostu?
T. Bognitz: Smy zhonili, zo su so někotři sobudźěłaćerjo jako dźěłopytacy přizjewili. Na kóncu budźetej dyrbjeć strowotniski a dźěłowy zarjad dilemu ze sobu wujednać. Nadźijamy so, zo nam hač do 15. měrca z wusadźenjom winowatosće šćěpjenja - za čož so dobroćelstwo hladanja w Budyskim wokrjesu sylnje zasadźuje - a rjadowanja wokoło winowatosće šćěpjenja - za čož so Caritas wupraji - brěmjo z ramjenjow wozmu. Politika dyrbi nětko najručišo jednać!
(Quelle: Serbske Nowiny vom 21.02.2022)