Jürgen Sedlmeier při polcach, na kotrychž maja drastu po wulkosćach rjadowanufoto: rl
Z křesćanskej myslu mjezsobneje podpěry a zachowanja stwórby bu wona před lětom zarjadowana, rozłožuje socialny dźěłaćer Jürgen Sedlmeier, kiž projekt nawjeduje. Dale skutkuje wón za Caritu jako poradźowar dołžnikow. "Bursa njeje jeno za přijimarjow socialneje pomocy myslena, ale za wšěch. Dźe wězo wo to, zo móža młode swójby něštožkuli na pjenjezach lutować, ale runočasnje tež wo to, wobswět wolóžić." Hdyž mjenujcy hišće dobru drastu dale wužiwaja, njetrjeba so nastajnosći nowa produkować.
Njeposrědnje před zachodom do dźěćaceho domu steji kontejner z drastu.foto: rl
Měnjenska bursa na parkowanišću dźěćaceho domu swjateho Bjarnata w Kamjencu, Wysoka 2, je wutoru wot 8.00 do 10.00 hodź. a štwórtk wot 15.00 do 17.00 hodź. wotewrjena. W tym času stej stajnje dwě čestnohamtskej wosobje na městnje, zo byštej wopytowarjam při jich naležnosćach pomhałoj. "W prěnim rjedźe dźe wo to, hižo njewužiwanu dźěćacu drastu hač do wulkosće 164 přinjesć a druhu sobu wzać, potajkim woprawdźe wuměnić", Jürgen Sedlmeier wuswětla. We wosebitych padach móže tež něchtó drastu jenož wotedać, bjez toho zo druhu sobu bjerje. "Ale njemóžemy prosće wšitko přiwzać, dokelž scyła telko městna nimamy."
Měnjenska bursa je w barbnje pomolowanym kontejneru zaměstnjena. Tón nastajichu z pjenježnej podpěru Drježdźansko-Mišnjanskeho biskopstwa a w zhromadnym dźěle z Kamjenskej katolskej wosadu swjateje Marje Madleny. "Mějachmy prjedy, jako měješe Carita hišće swoje sydło w Kamjencu na Haydnowej, hižo raz tajku měnjensku bursu za dźěćacu drastu. Ale skónčnje nam městno pobrachowaše." Wobmjezowaneho městna dla hodźa so tež nětko jenož drasta a črije wuměnjeć. Dźěćace wozyčki abo łoža a dalše wulke předmjety drje móža tam starši druhim tohorunja poskićeć, ale jenož w formje cedlki na sćěnje hnydom při durjach.
Socialnemu dźěłaćerjej Jürgenej Sedlmeierej je wažne, zo w měnjenskej bursy tež na druhe poskitki Carity skedźbnjeja, na přikład na poradźowanje samodruhich žonow w konfliktnych padach abo na poradźowanje dołžnikow. Za to su tam wotpowědne flajery wupołožene. Po jednym lěće wón zwěsća, zo ludźo měnjensku bursu derje wužiwaja. "W běhu dwuhodźinskich wotewrjenskich časow přichadźa přerěznje pjeć swójbow abo tež jednotliwych wosobow." Wón pak hižo dale planuje. Tak mysli na wuměłski projekt z molerku. Ručež budźe wšitko jasne, chce to zjawnje předstajić.